|
ढल्केवर, धनुषा
धनुषाको मिथिला नगरपालिका–९ बेंगाडावरमा बलात्कार गरी एक १४ बर्षीया बालिकालाई गर्भवती बनाएको घटना सार्वजानिक भएको छ । बलात्कृत बालिकाका अभिभावकले आरोपित विरुद्ध प्रहरीमा उजुरी दिएपछि उक्त घटना बाहिरिएको हो ।
प्रहरीले उजुरीको आधारमा बिहिवार बलात्कार आरोपित स्थानीय ५९ बर्षीय सोमबहादुर घिसिङ्गलाई पक्राउ गरेको हो । गत बैशाख ५ गते खर्साङ्गे डाडा सामुदायिक वनमा बाख्रा चराउन गएकी ती बालिकालाई आरोपित घिसिङ्गले ललाई फकाई जबरजस्ती करणी गरेको प्रहरी जनाएको छ ।
प्रहरीका अनुसार बलात्कृत बालिकालाई आरोपित घिसिङ्गले विभिन्न किसिमको डर तरास देखाई पटकपटक जबरजस्ती करणी गर्दै आएको उजुरीमा उल्लेख छ । घटनाको तीन महिनापछि शुक्रवार पीडित पक्षले बलात्कार आरोपित विरुद्ध प्रहरीमा जाहेरी दिएको छ । बलात्कृत बालिका गर्भवती रहेको समेत ती घटनाको अनुसन्धानमा खटिएका एक प्रहरी अधिकारीले बताए ।
बालिकाका बुवाले प्रहरीमा दिएको जाहेरीको आधारमा आरोपित घिसिङ्गलाई पक्राउ गरिएको ईलाका प्रहरी कार्यालय ढल्केवरका प्रहरी निरीक्षक रामसागर सिंंहले जानकारी दिए । उनले पक्राउ परेका घिसिङ्गलाई जबरजस्ती करणी मुद्दामा शुक्रवार धनुषा जिल्ला अदालतबाट म्याद थप गराउने तयारी रहेको जनाए ।
बलात्कृत बालिकाको शुक्रवार स्वास्थ्य परिक्षण गराईने र घटना सम्बन्धमा थप अनुसन्धान भईरहेको ईलाका प्रहरी कार्यालय ढल्केवरले जनाएको छ ।
