|
ढल्केवर, धनुषा
नेपाली कांग्रेसका सहमहामन्त्री तथा धनुषा–४ प्रतिनिधिसभा सदस्यका उम्मेदवार महेन्द्र यादवले जेष्ठ नागरिक भत्ता ६५ वर्षमै दिने बताएका छन् ।
शनिबार धनुषाको ढल्केवरमा चुनावी सभालाई सम्बोधन गर्दै नेता यादवले सत्तागठबन्धनको जित भए जेष्ठ नागरिक भत्ता ६५ वर्षमा झारिने जानकारी दिए । ७० उमेर पार गरेका जेष्ठ नागरिकलाई वृद्धभत्ता दिँदै आएकोमा सत्तागठबन्धनको सरकारले ६८ वर्षपछि नै दिन थालेको बताउँदै उनले वृद्धभत्तासमेत बढाउने बताए ।
कांग्रेस नेतृत्वको सरकारले चालू आर्थिक वर्षको बजेटदेखि ६८ वर्ष पुगेका जेष्ठ नागरिकलाई वृद्धभत्ता दिँदै आएको छ । सत्तागठबन्धनको जित भए ज्येष्ठ नागरिक भत्ता ६५ वर्षमा झारिनेछ, नेता यादवले भने ।
ज्येष्ठ नागरिक भत्ता ६५ वर्षमै झारिने कुरा नेपाली कांग्रेसको घोषणपत्रमै उल्लेख गरिएको जानकारी दिँदै नेता यादवले कांग्रेसले ६५ वर्षमाथिका सबै ज्येष्ठ नागरिकको निशुल्क स्वास्थ्य बीमा गर्ने घोषणा गरे । त्यस्तै ७३ वर्ष पुगेकाहरुको उपचार निशुल्क गर्ने घोषणा पनि गरेको बताए ।
