ढल्केबर, धनुषा । धनुषाको धनुषाधाम नगरपालिका–१ मा रहेको एक चिरान मिलबाट ठूलो मात्रामा अवैध सालको काठ बरामद गरिएको छ। डिभिजन वन कार्यालय धनुषाका कर्मचारीले चिरान मिलमा छापा हानेर अवैध काठ बरामद गरेका हुन् ।

डिभिजन वन कार्यालय धनुषाका प्रमुख विनोद सिंहले प्रमोद ठाकुरको स्वामित्वमा रहेको चिरान मिलबाट १३९ क्यूफिट साल प्रजातिको काठ र एक थान काठ काट्ने कटर मेसिन बरामद गरिएको बताउनुभयो । अवैध रूपमा लुकाएर राखिएको काठको सूचना पाएपछि वन कार्यालयले स्थानीय प्रहरीसँग समन्वय गरी छापा हानेको उहाँले जानकारी दिनुभयो । बरामद गरिएको काठ र मेसिन हाल वन कार्यालयको नियन्त्रणमा रहेको छ ।

यसैगरी, पुष्पवलपुर सव डिभिजन वन कार्यालय र भाटीघारी सामुदायिक वनका पदाधिकारीहरूको संयुक्त गस्ती टोलीले धनुषाको मिथिला नगरपालिका–३, लालभितिबाट १० थान साल जातको गोलिया बरामद गरेको छ । वन क्षेत्रबाट अवैध रूपमा काठ ओसारपसार भइरहेको थाहा पाएपछि टोलीले ती काठ बरामद गरेको हो ।

वन संरक्षण अधिकारीले धनुषामा अवैध काठ तस्करी रोक्न थप कडा कदम चाल्ने बताएका छन् । डिभिजनल प्रमुख सिंहले भन्नुभयो, “अवैध काठ ओसारपसारमा संलग्न कुनै पनि व्यक्ति वा समूहलाई कानूनी कारबाही गरिनेछ । धनुषाका विभिन्न क्षेत्रमा वन अपराध नियन्त्रणका लागि सुरक्षा गस्तीलाई थप प्रभावकारी बनाउने योजना अघि सारिएको छ ।” वन क्षेत्रको संरक्षण र वन पैदावारको अनियमिततामा रोक लगाउन वन कर्मचारी र स्थानीय समुदायबीच सहकार्य आवश्यक भएको उहाँले बताउनुभयो ।